Американската агенција за храна и лекови (ФДА) одобри тест на крвта со кој може да се открие кои жени се во опасност од развој на смртоносна компликација во бременоста – прееклампсија.
Тестот развиен од Thermo Fisher Scientific може да послужи како рано предупредување за состојбата за која нема лек и често има нејасни симптоми. Се верува дека претходно оваа година олимпијката Тори Боуви починала токму од оваа состојба .
Тестот на крвта може да помогне да се утврди кои бремени жени ќе развијат прееклампсија. Се покажало успешно во 96 проценти од случаите.
Оваа состојба влијае на една од 25 бремени жени
„Тоа е револуционерно. Тоа е првиот чекор напред во дијагнозата на прееклампсија, која првпат беше дефинирана во 1900 година“, изјави за Њујорк Тајмс д-р Даг Волкерс, професор по фетална медицина на Универзитетот во Калифорнија, Сан Диего.
Прееклампсијата обично се развива на половина пат од бременоста. Се карактеризира со висок крвен притисок и зголемено ниво на протеини во урината, што укажува на оштетување на бубрезите. Многу жени можеби немаат никакви видливи симптоми, а други знаци може да вклучуваат ниски тромбоцити во крвта, силни главоболки, промени во видот, отежнато дишење, болка под ребрата и гадење или повраќање, според Клиниката Мајо. Ако не се лекува, може да премине во еклампсија, потешка форма на состојбата која предизвикува напади, кома и смрт.
Не постои лек за прееклампсија
Иако зголемувањето на телесната тежина за време на бременоста е вообичаено, наглото зголемување на телесната тежина и отекувањето, особено на лицето, може да бидат знаци на прееклампсија. Фактори на ризик вклучуваат повеќекратна бременост, хроничен висок крвен притисок, дијабетес, автоимуни нарушувања, дебелина и возраст на трудницата над 35 години.
„Немаме лек за прееклампсија, освен породување“, додава д-р Волкерс.
Прееклампсијата погодува околу една од 25 бремени жени, а повеќе од 70.000 жени ширум светот умираат од неа секоја година, според Центрите за контрола и превенција на болести. Тоа е во пораст во САД, каде што бројот на случаи се зголеми за 25 проценти во изминатите две децении.