Едноставни начини на кои можеме полесно да се поврземе со тинејџерите

Во обезбедувањето на поддршка на тинејџерите, од клучно значење е да се поттикне отворена комуникација и да се обезбеди сигурно опкружување за изразување на мислите и чувствата. Како што децата стануваат постари и понезависни, лесно е да започнете со родителство на автопилот и да се остават да си го прават своето.

Родителите кои се обидуваат да се поврзат со своите тинејџери понекогаш може да се чувствуваат како комуникацијата да станува сè потешка. Важно е да се најдат начини да се биде тука за нив без да се загрози нивното чувство на независност.

Изнаоѓањето начини да бидeме присутни и да се поврземе со тинејџерите им олеснува да ни се обратат кога им треба поддршка, совет и слично.

Еве неколку идеи.

Побарајте нивна помош во кујната
Дури и ако не ни треба нивната помош, можеме да ги поканиме да ни се придружат во кујната и да помогнат. Тоа е можност да ги научите на потребните вештини за растење, притоа градејќи ја нивната самодоверба.

Гледајте што ви испраќаат
Иако не е секогаш она што сакаме да го видиме, важно е да одвоиме неколку минути за да погледнеме што ни испратиле бидејќи тоа ги прави среќни. Без разлика дали се работи за видео на Тик-Ток или за објава на Инстаграм, тоа е исто така можност за поврзување, а можеме да добиеме идеја за што се заинтересирани во моментов.

Слушајте ја нивната музика
Многу родители не го сакаат вкусот на нивните деца за музика. Меѓутоа, понекогаш децата сакаат да ги слушаме нивните песни, а ние како родители треба да одвоиме неколку минути за да слушаме нешто што сакаат да го споделат со нас. Важно е да им покажеме дека можат да се чувствуваат удобно да ги споделат своите интереси со нас, пишува TulsaKids Magazine.

Почитувајте ја нивната приватност
Едноставен начин на кој можеме да изградиме доверба со нашите тинејџери е да им дозволиме да имаат свој простор и приватност кога им е потребно. На пример, може да тропнеме пред да ја отвориме вратата од нивната соба и да побараме дозвола да влеземе. Важно е да се чувствуваат безбедно во својот простор.

Поддршката и разбирањето играат клучна улога во процесот на растење. Иако тинејџерите на оваа возраст стануваат понезависни, родителите сепак треба активно да работат на одржување на врската со нив. Овие достапни и внимателни интеракции помагаат да се одржи силна врска со тинејџерите додека тие се движат низ овој предизвикувачки период.