Градинарство во училиштата во Холандија – Ние ги имаме училишните градини на Слоу фуд

Предноста на учењето преку пракса и вистинските, применливи примери се секако најдобриот начин децата да стекнат вистинско знаење. Со примена на стекнатото знаење и учење преку пракса, децата полесно ќе го совладаат материјалот, но и ќе научат како навистина да го користат сето она што ќе го научат.

Градинарството во училиштата како повод за физичка активност
Учењето за природата и земјоделството, односно за растенијата и целиот процес на растење има повеќекратни предности.

Со тоа што времето го поминуваат во градината – децата се физички активни и редовно се на отворено и на чист воздух. Ова придонесува за подобро здравје на децата, физичка сила, но и го подобрува имунолошкиот систем и овозможува подобра концентрација.

Зошто спонтаното скокање е добро за здравјето на децата

Освен физичка активност, децата во Холандија на „часови по градинарство“ учат сè за растенијата – како се садат, каков е процесот на развој, како да се одржуваат растенијата, но и како да се берат и користат плодовите… На овој начин , децата го запознаваат целиот процес на одгледување растенија, но и дел од производството на храна.

Учење за природата и човечките односи
Преку негување и одгледување растенија, децата лесно ќе совладаат некои вештини кои ќе им бидат важни во другите сфери од животот. Градинарството придонесува за развој на одговорност кај децата, но и трпение и соработка кога тие работат заедно со иста цел – да произведат нешто здраво. На овој начин децата развиваат подлабоко разбирање за грижата за околината и природата, но и за меѓучовечките односи и емпатијата.

Одгледувањето овошје и зеленчук придонесува за поздрави навики во исхраната
Ентузијазмот за одгледување овошје и зеленчук што тие подоцна можат да ги јадат е тоа што може многу да придонесе за воспоставување на здрави навики во исхраната кај децата. Ова е секако еден од најважните аспекти на ваквата работа со децата – затоа што децата се поврзуваат со природата, со растенијата и на крајот со храната што ја јадат, а која самите тие, со свои раце, ја создале!

Кога децата ќе знаат повеќе за овошјето и зеленчукот што го јадат, како се одгледуваат и подготвуваат, што содржат и како влијаат на нашето здравје – сигурно е дека ќе имаат поголема желба да се хранат на тој начин. Здравите навики во исхраната се нешто што се учи, нешто со кое никој не се раѓа – но секој има можност да го усвои, а еден од најдобрите начини е токму овој – преку интересни активности во колективот.

Затоа и кај нас веќе десет години успешно опстојува и постепено се развива проектот за создавање што повеќе училишни градини низ Македонија, во организација на Слоу фуд.