Истражувањето открило: Пушењето во тинејџерските години е поврзано со помала моќ на мозокот!

Тинејџерите кои подлегнуваат на притисокот од врсниците и почнуваат да пушат веројатно го прават тоа затоа што имаат помалку сива материја во делот од мозокот кој влијае на донесувањето одлуки и следењето на правилата.

Покрај тоа, младите кои развиваат навика за пушење имаат тенденција да доживеат намалување на сивата материја во делот од мозокот кој го контролира управувањето со задоволството до крајот на нивните тинејџерски години.

Барем така произлегува од студијата за влијанието на пушењето врз адолесцентите и младите во Велика Британија, Франција, Германија и Ирска, спроведена од универзитетите во Кембриџ, Фудан и Ворвик, додека резултатите се објавени во списанието Nature Communications.

Откако ги споредиле резултатите од снимањето на мозокот на учесниците кои почнале да пушат на 14-годишна возраст со оние кои не пушеле и ја повториле постапката за истите учесници на возраст од 19 и 23 години, откриле дека „во просек, тинејџерите кои почнале да пушат до 14-тата година имаат значително помалку сива материја во делот на левиот фронтален лобус поврзан со донесувањето на одлуки и кршењето на правилата“.

Сивата материја, ткивото кое ги обработува информациите и ги содржи сите неврони на органот, го доживува својот врв на раст пред адолесценцијата, иако целокупниот развој на мозокот продолжува до зрелоста.

Тимот научници, исто така, открил дека луѓето кои почнале да пушат на 14 години имале „губење на сивата материја во десниот префронтален кортекс“, кој исто така е дел од мозокот поврзан со прекумерно пиење и употреба на марихуана.

„Помалку сива материја во овој регион на мозокот може да ја ограничи когнитивната функција, што доведува до помала самоконтрола и тенденција за ризично однесување, како што е пушењето“, вели Барбара Сахакијан од Одделот за психијатрија на Универзитетот во Кембриџ.