Разговорот за романтичните врски со родителите на многу тинејџери им звучи како сцена од хорор филм, но не мора да биде така. Наоѓањето партнер на тинејџерска возраст е важно за развојот на децата, а родителите можат да го зајакнат односот со нив и да им ги дадат вистинските совети. Сепак, овој разговор не е секогаш наједноставен ниту за родителите, но постојат неколку начини на кои можете да го направите тоа.
Дајте му до знаење на детето дека може да ви се отвори
Започнувањето разговори за романтични врски, особено ако тоа е ваш прв разговор, бара безбеден и неосудувачки простор. Покажете им дека имате намера да ги сослушате, да ги разберете и да дадете корисни совети. Создадете средина каде што нема да се плашат од осудување и каде што ќе бидат повеќе склони да ги споделат своите искуства и емоции.
Не правете претпоставки
Една ефективна стратегија за градење разбирање и доверба е да се користи родово неутрален јазик. Дозволете му на вашиот тинејџер да ги дефинира сопствените искуства, наместо да претпоставувате што било за неговите преференции. Според The Times of India, овој метод поттикнува искрена комуникација, што му олеснува на детето да ги изрази своите чувства без да размислува дали ќе го осудувате.
Објаснете им дека има разлика помеѓу љубов и восхитување
Помогнете им на тинејџерите да ја разберат разликата помеѓу љубовта и восхитувањето. Во вашиот совет, нагласете ја важноста да не се донесуваат избрзани заклучоци кои можеби не се точни. Кажете им дека љубовта полека се гради и дека треба да се потрудат да развијат врска со личноста која им се допаѓа. Ова знаење им дава на тинејџерите способност да управуваат со своите емоции и да бидат свесни за нивната ситуација.
Не дозволувајте да ве шокира нешто што не го очекувате
Кога тинејџерите ќе ви кажат нешто што може да ве изненади или збуни, од клучно значење е да останете со почит во понатамошната комуникација. Покажувањето смирено и разбирачко однесување го уверува детето дека неговите чувства се прифатени. Ова не само што ќе ја зајакне врската, туку и потенцијално ќе ве направи личност од доверба на која ќе ѝ се обрати за помош попрво отколку на некој друг.
Усмерете ги на вистинскиот пат
Научете го вашиот тинејџер како да препознава здрави и нездрави врски. Дискутирајте за клучните компоненти како почит, искреност, комуникација, граници, поддршка и согласност. Споделете ги сопствените искуства и научените лекции и нагласете ја важноста да се побара помош ако се соочуваат со предизвици или злоупотреба во нивните односи, известува The Times of India.
Со пренесување на ова знаење, вие ги зајакнувате вашите тинејџери и им помагате да донесат добри одлуки и да градат односи засновани на меѓусебно почитување и разбирање.
Не ги задевајте премногу
Кога сте возрасен и родител, задевањето често може да изгледа како добра шега. Но, потсетете се како е да се биде тинејџер и да се доживуваат такви ситуации. Прекумерното задевање може да има несакани последици, потенцијално да ја оштети самодовербата на тинејџерот и да предизвика ситуација кога тие не сакаат да ви се доверат. Тинејџерите се особено чувствителни во оваа фаза од животот и можат да го толкуваат задевањето како осудување или потсмев.