Најчести митови за бременоста во кои многумина сè уште веруваат

Веројатно нема тема која е толку полна со митови како бременоста. И покрај фактот дека информациите денес се на дофат на сите, сепак постојат различни приказни за бременоста. Некои од нив се земаат здраво за готово, а не се ни преиспитуваат.

Сигурно безброј пати сте слушнале дека не можете да забремените за време на менструацијата или дека трудницата треба да одмора и да јаде „за двајца“? Па, тоа не е баш така. Иако шансите за бременост за време на месечното крварење се помали, кај некои жени може да се случи нивната овулација да се поклопи со менструацијата, бидејќи треба да се запомни дека сперматозоидите преживуваат од три до пет дена. Покрај тоа, не секој циклус е редовен. Затоа понекогаш е тешко да се предвидат плодни денови. Од друга страна, ако бременоста е уредна, нема причина жената да се прејадува и исклучиво да мирува.

Според тоа, ова се митови за бременоста во кои многумина сè уште имаат тенденција да веруваат. Меѓутоа, бидејќи ова не се единствените приказни кои се полувистинити или неточни, издвојуваме некои од најчестите. Откако ќе ги научите, може да се запрашате колку од она што мислевте дека се факти всушност (не) држи вода.

Мит број 1 – Никогаш нема да забремените ако имате полицистични јајници
За да може жената да забремени, мора да има плодни денови (овулација). Бидејќи една од причините за нередовните менструални циклуси, а потоа и отсуството на овулација може да биде синдромот на полицистични јајници, многумина стравуваат дека никогаш нема да зачнат. Овој синдром е широко распространет кај жените во репродуктивна возраст, а доколку се открие, циклусите може да се доведат во ред со хормонска терапија.

Тогаш советот е да престанете да ја земате терапијата бидејќи тоа понекогаш доведува до спонтани овулации – што го овозможува зачнувањето. За некои жени, прогестеронската терапија за регулирање на менструалниот циклус ќе им го олесни ова, па по некое време треба да започнат да ја следат овулацијата и да планираат сексуален однос. Секако, не се сите ситуации со полицистични јајници исти и потребно е да се направи ултразвучен преглед и хормонален третман. Сепак, не ги слушајте приказните кои велат дека можете автоматски да се простите од тоа дека ќе забремените. Искуствата на многу жени велат дека бременоста е можна – понекогаш и кога најмалку очекувате.

Мит бр. 2 – Ќе знаете дали носите девојче или момче по трудничкиот стомак
Не, навистина. Дали ќе го носите бебето „горе“ или „долу“ нема никаква врска со неговиот пол. Впечатокот на „низок“ стомак се создава поради тонусот на стомачните мускули на мајката. Станува збор за следново: опуштената стомачна мускулатура доведува до помала поддршка за матката, што создава впечаток на „ниско“ носење. Ваквата бременост не претставува ризик доколку плацентата е во ред и трудницата не чувствува притисок. Во овој случај се препорачува одење и малку помалку седење. Се разбира, неопходно е да се консултирате со специјалист.

Мит бр. 3 – Не треба да се капете во када за време на бременоста
Дали мислите дека сте осудени само на туширање девет месеци? Размислете повторно. Капењето во када е дозволено за време на бременоста бидејќи може да ја опушти жената и да ја намали болката. Истовремено треба да се внимава и на температурата на водата која не треба да биде повисока од 36 степени. Топлата вода во раните недели од бременоста негативно влијае на фетусот, а подоцна може да предизвика пад на притисокот, што, следствено, го намалува снабдувањето со крв во плацентата. Сепак, додека водењакот не пукне, можете да уживате во топла бања која трае до 30 минути.

Од друга страна, не се препорачува изложување на сауна или други места каде што температурата се искачува над 37 степени или каде што постои ризик од инфекции и нечистотии. Особено внимателни треба да бидат жените кои се склони кон инфекции на уринарниот тракт и гениталиите, па затоа не им се советува да пливаат во јавни базени. Од друга страна, можете безгрижно да одите на море. Доколку бременоста е нормална, слободно можете да се разладите, но внимавајте на температурата на морето. Не влегувајте ненадејно и во никој случај не скокајте во море и не се изложувајте претерано на сонце.

Мит бр. 4 – Не можете да патувате со авион
Резервиравте лет, а потоа дознавте дека сте бремени? Не треба да се грижите. Ако бременоста е нормална, летот нема да ви наштети. Но, имајте на ум дека најдобро време за патување е во второто тримесечје, односно од 14 до 28 недела, бидејќи проблемите најчесто се јавуваат во првото или во третото тримесечје. Пред да тргнете задолжително консултирајте се со вашиот гинеколог и одберете седиште од кое ќе имате простор да ги истегнете нозете. Не консумирајте храна и пијалаци кои предизвикуваат надуеност и изберете удобна облека. Долгите патувања треба да се избегнуваат во третиот тримесечје, бидејќи породувањето може да ве најде неподготвени. Згора на тоа, некои компании не дозволуваат патување при крајот на бременоста токму поради оваа причина.

Мит број 5 – Бременоста и кафето не одат заедно
Можеби веќе сте добиле совет дека треба да избегнувате кофеин за време на бременоста. Сепак, нема ништо лошо во тоа понекогаш да пиете кафе или да се почестите со шолја кафе наутро. Секако, не треба да претерувате со кофеинот и никако да не пиете пет шолји кафе, бидејќи ваквото консумирање го зголемува ризикот од неповолен исход на бременоста.

Мит бр. 6 – Не ја фарбајте косата за време на бременоста
Друг мит е дека не треба да ја бојадисувате косата за време на бременоста. Тоа не е точно. Слободно грижете се за вашата коса, но кажете ѝ на фризерката дека сте бремени. Многу жени откриваат дека нивната коса расте побрзо во текот на тие девет месеци, па можеби ќе сакате да ја обновите вашата боја. Доказите за оваа тема се ограничени, но најбезбедно е да се почека до второто тримесечје за да се бојадиса косата. Изберете неагресивни бои, оние без амонијак и обидете се да не ги вдишувате хемикалиите. Кога ја фарбате косата, се препорачува да ги отворите прозорците, а потоа добро да го исплакнете скалпот. Имајте на ум дека најсигурната опција се прамените и преливите, но и дека вашата коса може да реагира поинаку поради хормоналните промени. Затоа, посетете го вашиот фризер, но изберете поблаги третмани.

Мит број 7 – Нема секс и вежбање за време на бременоста
Некои трудници немаат силна желба за секс, други се жалат на болки за време на сексуалниот однос, а трети се склони на „акција“. Како и да е, ако бременоста е нормална, не мора да се откажувате од страсните моменти. Прилагодете ги позите на фазата на бременоста и внимавајте на удобноста – тука би можела да ви помогне перницата. Опуштете се, а доколку пенетрацијата не ви е пријатна, тогаш не го правете тоа.

А не заборавајте и на физичката активност. Мит е дека трудницата треба само да одмора. Секако, ќе внимавате ако бременоста е ризична, но ако се е во ред, зошто да не правите лесни вежби? Вежбањето е секогаш здраво, исто така и опушта, а би можело и да го олесни породувањето. Затоа, консултирајте се со експерти за најдобриот сет на вежби и изведувајте ги се додека се чувствувате удобно.

Мит бр. 8 – Постпородилната депресија е бесмислица
До неодамна, менталното здравје беше тривијализирано во повеќето средини. Денес работите малку се сменија, па ќе ве потсетиме дека поплавата од реакции кои можат да ве зафатат веднаш по породувањето е сосема нормална. Не треба да се срамите од тоа или да го негирате. Сосема спротивно – разговарајте со вашиот партнер, пријатели или експерт за вашите емоции и побарајте совет.

Постпородилната депресија настанува како резултат на низа хормонални и психолошки промени низ кои поминува мајката со цел нејзиното тело да се врати во старата состојба. Најмногу погодува 15 проценти од жените кои се породиле, а симптомите се појавуваат неколку дена по породувањето. Обично траат и до две недели, а доколку траат подолго, навистина е неопходно да се побара помош бидејќи таквиот модел на однесување влијае на односот со бебето, а состојбата на мајката видно се влошува.