Не објавувам слики од своето дете на социјалните мрежи!

Многу родители објавуваат приказни, фотографии и видеа од своите деца на социјалните мрежи бидејќи се горди на своите семејства и сакаат да останат поврзани со роднините и пријателите. Како родители, ние и самите ја разбираме желбата да го споделиме она што го доживуваме во воспитувањето на детето.

Сепак, интернетот не е секогаш најбезбедното место за возрасните, особено ако се земе предвид количината на приватност што ја губиме секогаш кога споделуваме информации за себе онлајн.

Но, што е со децата и со бебињата? Колку е безбедно за нив? Дали треба да објавувате слики од деца на социјалните мрежи?

„Немам поим дали ќе се разочара кога како тинејџерка ќе дознае дека нема милион следбеници затоа што не ѝ отворив Инстаграм профил кога беше бебе“, ја започнува својата приказна една мајка.

„Без разлика каде сме, социјалните мрежи ни овозможуваат да бидеме во тек со нашите животи и тоа е прекрасна работа. Сакам да гледам слики од децата на моите пријатели и мислам дека е одлично што тие решиле да споделат видеа од нивното дете како пее, како се кикоти и ги прави првите чекори!

Сепак, јас избрав да не споделувам слики од бременоста, па дури и семејни фотографии од болницата кога пристигна нашата ќерка, бидејќи мојата бременост, раѓањето и растечкото семејство беа делови од мојот живот што сакав да ги заштитам од надворешниот свет.

Луѓето често ме прашуваат зошто не споделувам слики од мојата ќерка на социјалните мрежи сега кога е постара, а мојот одговор е: Живееме во свет во кој луѓето можат да научат многу за тебе за кратко време, а јас немам потреба луѓето да знаат каде е моето семејство 24/7.

Сакам да ја почитувам и приватноста на ќерка ми. Таа не е доволно стара за да ми каже дали е во ред тоа што го споделувам нејзиниот живот со светот!

На 16 месеци ќерка ми сака книги, си игра со своите играчки и сложувалки, ми помага да исчистам со правосмукалка, фрла совршено средена облека од фиоките, сака музика. Таа прави нешто паметно или смешно на секои пет минути.

Се разбира, би сакала да ги споделам овие работи со моите следбеници на социјалните мрежи. Не знам дали ќе се разочара кога како тинејџерка ќе дознае дека нема милион следбеници затоа што не ѝ отворив профил на Инстаграм кога беше бебе или ќе биде воодушевена од открието дека на интернет нема фотографии од неа во какви било ситуации кои би можеле да ја натераат да се чувствува засрамено.

Бегањето од социјалните мрежи ни создаде и неколку незгодни моменти.

На пример, кога ќерка ми беше бебе, се приклучивме на групата „Мама и јас“.

На првата средба, водителот ги поттикна сите мајки да се сликаат за време на часот и да ја означат програмата на социјалните мрежи.

Ја тргнав ќерка ми пред сите други мајки да почнат да ги фотографираат, снимаат, означуваат и објавуваат децата, а како резултат на тоа добив неколку превртувања со очи. Следната недела, кога мајките ги собраа бебињата на друга слика, успеавме да излеземе порано, за да не мораме да одговараме на повеќе прашања на оваа тема.

Сакам да нагласам дека само затоа што не објавувам приватни фотографии на Фејсбук, не значи дека мислам дека тоа што другите го прават е погрешно.

Дали ќе го фотографирам моето дете кога ќе тргне на училиште? Се разбира! Дали ќе ја споделам таа слика со името на училиштето, неговото одделение и името на наставникот? Не.

Секогаш кога сум била во средина каде што некој фотографирал група, да речеме на роденденска забава, не барав никој да не објавува слика од моето дете. Љубезно ги потсетував да не го означуваат мојот сопруг или мене на фотографиите.

Повеќето луѓе ја прифаќаат нашата позиција.

Не можам да го заштитам моето дете од сѐ, но можам да се однесувам со почит кон неа и да ги поддржам нејзините избори. Кога ќе биде доволно возрасна за да има мобилен телефон или кој било уред што сите го користиме, со задоволство ќе ѝ ги дадам сите фотографии што сум ги направила за да одлучи што да објави и кога!“