Ново истражување за тинејџерите и паметните телефони: Премногу е лошо, но малку е подобро од воопшто
Повеќе од 4 часа користење на паметни телефони дневно е поврзано со здравствени ризици за адолесцентите, но корејските истражувања покажале дека и младите луѓе кои воопшто не користат паметни уреди имаат зголемено ниво на стрес и здравствени проблеми
Младите луѓе кои ги користат своите паметни телефони повеќе од четири часа на ден имаат повисоки стапки на лошо ментално здравје и имаат поголема веројатност да користат нелегални супстанци, покажало корејско истражување спроведено над 50.000 тамошни адолесценти. Резултатите од истражувањето на Универзитетот Ханјанг во Сеул се објавени од списанието за отворен пристап Plos One.
Претходните истражувања покажале дека употребата на паметни телефони кај тинејџерите е зголемена во последниве години и дека таквата употреба може да биде поврзана со поголеми здравствени ризици, од психијатриски нарушувања и проблеми со спиењето до проблеми со очите и мускулно-скелетни нарушувања. Од друга страна, зголемените докази сугерираат дека умерената употреба на Интернет може да биде поврзана со подобро физичко и ментално здравје кај адолесцентите.
Истражувачите ги споредиле податоците од 2017 и 2020 година и откриле дека за тоа време, процентот на тинејџери кои користеле паметен телефон повеќе од два часа дневно се зголемил од 64,3 на 85,7 проценти. Увидот во нивните здравствени досиеја покажал дека адолесцентите кои користеле паметни телефони повеќе од четири часа дневно имале повисоки стапки на стрес, почесто размислувале за самоубиство и биле посклони кон консумирање разни супстанци.
Интересно, забележуваат истражувачите, адолесцентите кои користеле паметен телефон од еден час до два часа дневно имале помалку проблеми од адолесцентите кои воопшто не користеле паметен телефон. Се разбира, авторите забележуваат дека оваа студија не потврдува причинска врска помеѓу употребата на паметни телефони и негативните здравствени исходи, но би можела да помогне во носењето на упатства, особено ако секојдневната употреба продолжи да расте.