За време на летната сезона многу жени се прашуваат дали е безбедно да се сончаат на плажа или во солариум додека се бремени. Тие секако би сакале да имаат убав тен, но дали вреди да го ризикуваат своето здравје и здравјето на своето неродено дете?
Кога станува збор за трудници и сончање, следните информации може да ви помогнат во вашата конечна одлука – дали имате намера да се сончате на плажа, во солариум или планирате да користите самопотемнувачи.
Сончање за време на бременоста
Без разлика дали сте бремени или не, прекумерното изложување на сонце со себе носи ризици од рано стареење на кожата и појава на малигнен рак на кожата – меланом. Понатаму, УВ зраците ги оштетуваат очите и може да предизвикаат иритација, конјунктивитис или катаракта, особено ако не се носат очила за сонце со УВ заштита.
Покрај тоа, бремените жени треба да имаат на ум и некои други факти:
Изложувањето на сонце ја зголемува температурата на телото на жената, што ја зголемува температурата на фетусот, а тоа може да предизвика оштетување на мозокот
Можноста за дехидрација е опасност и за мајката и за детето
Естрогенот за време на бременоста предизвикува појава на клоазми (зголемена пигментација на кожата) која поради сончевите УВ зраци може, но не мора да остане по породувањето.
Сончање во првото тримесечје од бременоста
Некои студии ја нагласуваат врската помеѓу сончевите УВ зраци и недостатокот на фолна киселина. Имено, УВ зраците предизвикуваат разградување на фолната киселина која е главниот градежен материјал за здрав развој на нервниот систем.
Затоа, сончањето во првото тримесечје од бременоста, кога се одвива процесот на органогенеза, во никој случај не се препорачува, бидејќи може да го наруши развојот на мозокот и остатокот од нервниот систем.
Сончање во солариум
Во моментов, не постои истражување кое обезбедува непобитни докази за штетното влијание на солариумот врз фетусот. Општо земено, солариумот како опција за потемнување е еден од поштетните за човечката кожа и претставува брзо решение кое не е препорачливо да се повторува или да се претерува со него, имајќи го предвид зголемениот ризик од меланом.
Повеќето лекари не препорачуваат користење на солариум бидејќи ја зголемува телесната температура, а со тоа го загрева и фетусот.
Препарати за самопотемнување
На денешниот пазар има безброј производи кои гарантираат брзи и безбедни резултати. Нивната предност е што се избегнува изложување на УВ зраци и со тоа се намалува ризикот од меланом или други промени на кожата. За бремените жени е важно да се распрашаат за супстанциите содржани во самопотемувачите, бидејќи се што ставаат го наоѓа својот пат низ кожата до крвотокот и на крајот до фетусот.
На море во осмиот месец од бременоста
Имајќи го предвид сето горенаведено, бремените жени треба да ги следаат овие упатства:
Избегнувајте да одите на плажа напладне, планирајте или порано наутро или навечер
Носете заштитна покривка за глава и очила за сонце
Засолнете се во сенка
Носете лесна, удобна облека изработена од природни материјали
Користете креми за сончање кои се одобрени за употреба за време на бременоста.
Како заклучок, не е неопходно целосно да се избегнува сонцето, туку умерено и паметно да се изложувате во текот на денот, бидејќи на овој начин ја собираме саканата количина на витамин Д.