Една од шест жени со рак на дојка нема грутка во градите

Можно е да имате рак на дојка без опиплива грутка, а околу едно од шест лица со рак на дојка не пријавиле присуство на грутка при дијагнозата.

Ракот на дојка без грутка обично покажува други симптоми, но можно е да се дијагностицира асимптоматски карцином на дојка (без грутка или други симптоми) доколку се открие при мамографски преглед за рано откривање на рак на дојка.

Некои видови на рак на дојка, вклучително и лобуларен карцином и воспалителен карцином на дојка, се со поголема веројатност да се појават без грутка.

Прочитајте повеќе за симптомите на кои треба да внимавате, како и за тоа колку долго може да имате рак на дојка без да знаете или без да имате никакви симптоми.

Две најчести форми на рак на дојка кај кои не се појавува грутка

Ракот на дојката се јавува кога клетките во ткивото на дојката почнуваат неконтролирано да се размножуваат. Тие можат да се групираат, да формираат тумор и да почнат да се шират од местото на потекло.

Најчеста локација на формирање на тумор е во обвивката на каналите кои го пренесуваат млекото. Овие тумори се нарекуваат дуктални карциноми и сочинуваат 70 до 80 проценти од случаите на рак на дојка. Тие често се откриваат за време на мамографски преглед или кога некое лице или неговиот доктор ќе почувствуваат грутка во градите.

Како што наведува Verywell Health, во споредба со другите типови, два типа на рак на дојка се со поголема веројатност да се појават без симптоми на грутка, а тоа се лобуларен карцином и воспалителен карцином на дојка.

Вториот најчест тип на рак на дојка е лобуларниот карцином, кој се јавува во млечните жлезди и се однесува поинаку од дукталниот карцином. Лобуларниот карцином сочинува околу 10% од случаите на рак на дојка. Не создава грутки, туку предизвикува згуснување на ткивото на дојката. Ова задебелување прави градите да се чувствуваат поинаку на допир, но не како кога ќе почувствувате грутка под раката.

Воспалителниот карцином на дојка сочинува околу пет проценти од случаите на рак на дојка.

Тоа е редок вид на дуктален карцином кој може да биде особено агресивен и обично не се формира како грутка и можно е да не се детектира на мамограм.

Ваквите видови на рак се нарекуваат воспалителни бидејќи предизвикуваат симптоми како црвенило и оток бидејќи ги блокираат лимфните садови на кожата.

Можно е да имате рак со години пред да биде откриен

Како и кај многу видови на рак, луѓето често нема да знаат дека имаат рак на дојка додека не откријат грутка или додека не почнат да развиваат други симптоми. Сите видови на рак најпрво се појавуваат како асимптоматски и се толку мали што не е можно веднаш да се детектираат.

Во многу случаи, туморот расте и грутката станува доволно голема за да биде откриена со редовни самопрегледи. Скрининзите како мамографија, ултразвук или магнетна резонанца можат да го откријат ракот на дојката пред да се појават грутка или други симптоми, така што редовните прегледи се добра форма на превенција.

Можно е да имате рак на дојка, а тоа да не го знаете со години, во зависност од брзината со која почнува да се развива, расте и да се шири.

Речиси 288.000 нови случаи на рак на дојка се дијагностицираат во САД секоја година. Повеќе од половина од овие видови на рак се откриени пред да се прошират надвор од градите, а околу 50.000 случаи се откриени пред официјално да се класифицираат како рак, односно во стадиум 0.

Во некои случаи, ракот на дојката не создава грутка што можете да ја почувствувате.

Можеби нема да знаете дека имате рак додека не почнете да развивате други симптоми и не ги пријавите кај вашиот лекар.

Според една студија од 2017 година, приближно 17% од случаите на рак на дојка се дијагностицираат без присуство на грутка. Во овие случаи, прво може да се тестираат други здравствени проблеми, што може да ја одложи дијагнозата и да го отежне лекувањето подоцна.

Симптомите на таквите видови на рак се поинакви

Според истражувањето објавено во списанието Cancer Epidemiology, околу 83% од луѓето со рак на дојка имаат грутка кога првпат ќе го посетат докторот.

Истражувањето ги анализирало симптомите на 2.300 жени во Велика Британија на кои им бил дијагностициран рак на дојка.

Истражувачите откриле дека околу една од шест жени посетувале лекар поради симптоми кои не се грутка, а околу 11 проценти од тие симптоми биле промени на градите, додека пет проценти од симптомите не биле поврзани со градите.

Најчестите регистрирани симптоми се следниве:

Промени во брадавицата, вклучително и повлекување или истекување на течност која не е млеко
Болка или чешање во градите или брадавицата
Промени на кожата, вклучувајќи лупење, црвени точки, дамки или кожа што изгледа како кора од портокал
Отворена рана на дојката
Промени во обликот на дојката
Промени во големината на градите
Инфекција на дојката или знаци на воспаление – црвенило и топлина.

Исто така, се појавуваат симптоми кои не се поврзани со градите и вклучуваат:

Грутка во пазувите

Болка во пазувите

Оток на раката

Грутка во вратот или други знаци на отечени лимфни јазли

Болка во коските или мускулите

Замор или слабост

Губење на тежината.

Последици од задоцнета дијагноза

Ракот на дојка е многу полесен за лекување и има многу повисоки стапки на преживување кога се дијагностицира рано.

Стапката на петгодишно преживување за рак на дојка кој не се проширил на други ткива е 99,1%. Таа бројка паѓа на 86,1% ако се проширила на други блиски ткива или лимфни јазли, а ако се проширила и на други органи, стапката на петгодишно преживување за рак на дојка е 30%, се вели во студијата.

Кога ракот на дојката се јавува без грутка, жените често чекаат подолго пред да пријават други симптоми кај својот лекар, што може да резултира со доцна дијагноза.

Некои симптоми, особено кај помладите луѓе или оние кои дојат, може погрешно да се протолкуваат.

Според една студија објавена во Cancer Epidemiology, околу 15% од жените со рак на дојка без грутка чекале повеќе од 90 дена пред да побараат помош – двојно повеќе од оние со грутка.

Луѓето кои чекаат подолго за точна дијагноза на рак на дојка може да ѝ наштетат на својата прогноза.

Пропуштена или одложена дијагноза на рак на дојка може да бара поагресивен третман и полоша прогноза.

Нема многу студии за тоа колку често здравствените работници ја пропуштаат или одложуваат дијагнозата на рак на дојка во реалниот свет. Некои студии сугерираат дека погрешна дијагноза на која било болест се случува околу пет проценти од времето. Покрај тоа, мамографиите пропуштаат приближно 12% од случаите на рак на дојка.