Луѓето кои имаат домашни миленици често уживаат во нивното друштво толку многу што ги пуштаат во нивниот кревет, да спијат со нив. Додека медицинските експерти претходно советуваа да не спиете со домашни миленици, новото истражување сугерира дека оваа практика може да има позитивно влијание врз физичкото и емоционалното здравје на сопствениците.
Домашните миленици нудат сигурност, но можат да влијаат на квалитетот на сонот или да предизвикаат алергии кај некои луѓе, доколку ги пуштат во постела. Дали придобивките ги надминуваат ризиците зависи од вас, вашето домашно милениче и вашите животни склоности. Истражувањата и субјективното човечко искуство сугерираат дека спиењето со домашно милениче може да има различни придобивки.
Домашното милениче може да ја намали анксиозноста и осаменоста на сопственикот
Некои луѓе одбираат домашно милениче, особено куче, за заштита. Кучето во куќата може објективно, но и субјективно да ја зголеми безбедноста на сопственикот. Во една студија спроведена во САД, жените кои спиеле со своите кучиња изјавиле дека се чувствуваат побезбедни.
Кучињата исто така можат да обезбедат чувство на удобност и сигурност на луѓето со посттрауматско стресно нарушување кои имаат кошмари. Постојат и специјално обучени кучиња кои можат да ги идентификуваат физичките знаци кои укажуваат на тоа дека личноста има кошмар, па во тој момент да ја разбудат.
Во една студија на ветерани кои страдале од посттрауматско стресно растројство, 57 отсто рекле дека кучето им помагало да ги олеснат нивните кошмари.
Бројни истражувања дошле до заклучок дека домашните миленици генерално позитивно влијаат на менталното здравје на луѓето. За многу луѓе со долгорочни нарушувања на менталното здравје, кучињата можат да бидат дел од мрежата за поддршка, дури и ако не се специјално обучени кучиња.
Миленичето може да ја намали анксиозноста и осаменоста, да ги ублажи симптомите на нарушувања на менталното здравје, да помогне во регулирањето на емоциите, додека позитивната интеракција со кучето го зголемува нивото на окситоцин кај возрасните и го намалува нивото на кортизол кај децата.
Повеќето студии за придобивките од домашните миленици за менталното здравје се спроведени додека учесниците биле будни, па не е јасно дали овие придобивки се јавуваат и кога луѓето спијат со своите миленици.
Сепак, се чини дека релаксирачкиот ефект од интеракцијата со домашно милениче е барем делумно поради физичкиот контакт.
Многу луѓе тврдат дека спиењето со домашно милениче влијае на нивниот сон, а претходното истражување покажало дека луѓето кои имаат домашни миленици имаат помала веројатност да земаат апчиња за спиење од оние кои немаат.
Присуството на кучиња или мачки значително влијае на тоа кои бактерии ќе се најдат во домот, што влијае на имунитетот. Истражувачите претпоставуваат дека изложеноста на различни микроорганизми има корист за здравјето на луѓето и го зајакнува имунитетот, а недостатокот на разновидна изложеност може да биде виновен за порастот на алергиите и автоимуните нарушувања.
Според некои истражувања, присуството на животни во раното детство го зајакнува имунитетот
Претходните истражувања покажуваат дека галењето куче го зголемува имунолошкиот одговор, така што блискиот контакт, споделувањето на просторот за спиење, може да биде од корист за имунолошкиот систем. Сепак, потребни се повеќе истражувања за да се потврди ова тврдење.
Придобивките што милениците можат да ги дадат во зајакнувањето на имунитетот се веројатно уште поголеми за децата и доенчињата, бидејќи нивниот имунолошки систем се развива. Утврдено е дека животот со мачка во првата година од животот на една личност го преполовува ризикот таа да стане алергична на мачки до 18 години. За машките, живеењето со куче во текот на првата година од животот на сличен начин ја намалува можноста да станат алергични на кучиња. Присуството на две или повеќе кучиња или мачки во домот во првата година од животот на детето исто така може да ја намали веројатноста дека подоцна ќе развие други алергии, на пр. на грини, сина трева и амброзија.
Ризици од спиење со домашните миленици
Иако спиењето со домашни миленици им носи радост на многумина, тоа исто така може да претставува ризик за некои луѓе.
Луѓето кои се алергични на животни и имаат домашни миленици обично ги држат надвор од спалната соба, дури и во текот на денот, за да избегнат изложување на влакна и првут.
Иако изложеноста на домашни миленици во детството го прави човекот помалку чувствителен на алергени, истражувањата сугерираат дека ако одлучите да имате домашно милениче на подоцнежна возраст – тоа може да ве направи почувствителни на алергени од домашни миленици.
Утврдено е дека имањето мачка како домашно милениче само во зрелоста е поврзано со егзема.
Фактот што домашните миленици внесуваат повеќе микроорганизми во вашиот дом има и предности и недостатоци. Од една страна, изложеноста на повеќе бактерии и други микроби може да помогне во зајакнувањето на човечкиот имунолошки систем. Од друга страна, домашните миленици можат да внесат и штетни бактерии, вируси и паразити, со што нивните сопственици се изложени на ризик од зооноза. Зоонози се заразни болести кои животните ги пренесуваат на луѓето.
Анкетите покажуваат дека мачките можат да го нарушат сонот на човекот повеќе од кучињата
Луѓето кои се повеќе склони кон инфекции, оние со ослабен имунитет и оние со отворени рани треба да избегнуваат да спијат со домашни миленици. Сопствениците на домашни миленици треба да бидат свесни дека дозволувањето на нивното милениче да им го лиже лицето го зголемува ризикот од разни болести.
Домашно милениче во вашиот кревет навечер може да предизвика пореметување на сонот. Во едно истражување, 20 проценти од луѓето изјавиле дека милениците ги вознемируваат додека спијат во иста просторија.
Последиците од споделувањето кревет со куче врз квалитетот на сонот се веројатно релативно благи. Меѓутоа, ако сакате да го намалите нарушувањето на спиењето, истражувачите откриле дека вашето куче сепак треба да спие на друго место во спалната соба.
Нарушувањата на сонот може да зависи и од типот на домашно милениче. Во едно истражување, жените кои делеле кревет со куче пријавиле помалку нарушувања на спиењето од оние кои делеле кревет со мачка. Сепак, потребни се повеќе истражувања пред да се заклучи дека мачките повеќе го попречуваат спиењето.