Германија воведува право на породилно отсуство по абортус
Жената мора да има можност да се опорави и физички и психички доколку нејзината бременост заврши со абортус или со раѓање на мртво дете. Еве во кои други земји постои закон според кој жената има право на платено отсуство по бременост која не завршува со раѓање на живо дете.
Кога бременоста не завршува со раѓање на дете, тоа е крајно трауматично искуство за двајцата родители, а особено за жената која до тој момент била бремена.
Ова е состојба која бара одреден период на опоравување и не е лесно речиси веднаш да се вратите на секојдневниот живот, како ништо да не се случило.
Жената мора да има можност да се опорави и физички и психички.
Некои жени добиваат можност да го направат тоа во својот живот, додека други немаат толку среќа и мора брзо да функционираат како ништо да не се случило.
Во многу земји не постои со закон утврдено платено отсуство по абортус, а во некои дури ни по раѓање на мртво дете.
Во Германија моментално се воведува револуционерен закон кој ја проширува можноста за породилното отсуство да ги вклучи и жените кои доживеале спонтан абортус по 13-та недела од бременоста.
Овој закон е исклучително важен затоа што ги признава физичките и емоционалните последици од загубата на бременоста, а на жените им дава можност – но не и обврска – да земат слободно време за да закрепнат.
Ова е важен чекор во заштитата на здравјето на жените, но овој дел сè уште не е признаен во повеќето земји. Имено, ретки се државите кои имаат ваков закон кој ги штити жените кои абортирале на овој начин.
Еве неколку други земји кои го признаваат ова или слично право: Индија гарантира шест недели платено отсуство за абортус. Нов Зеланд дава три дена отсуство за двајцата родители.
Филипините обезбедуваат 60 дена платено отсуство за жени кои доживеале спонтан абортус или итен прекин на бременоста. Во Велика Британија се разговара за нова политика која би дозволила две недели платено отсуство за спонтан абортус.
Давањето правна поддршка на мајките кои доживеале спонтан абортус или раѓање на мртво дете не е само за пофалба за хуманоста што ја покажува, туку е и препознавање на здравствените последици од таков настан, признавајќи дека мора да има период на закрепнување и тага и дека жената заслужува време и поддршка.