Порано децата чекаа со часови да почне нивната омилена емисија на ТВ или да бидат готови фотографиите од роденденот. Денеска за да го добијат она што го сакаат доволен им е еден допир на екранот – веднаш и сега. Дигиталната ера ни донесе неверојатни можности, но и предизвици, а еден од најголемите е – како да ги научиме децата да чекаат?
Трпението не е вродена особина, туку вештина која се учи и се развива.
Во свет каде што сè се случува веднаш, децата сè потешко поднесуваат чекање, одложување на наградата и фрустрации. А токму овие способности се клучни за нивниот иден успех, емоционална стабилност и среќен живот.
Како да му помогнете на детето да научи што значи трпение?
1. Бидете добар пример
Децата учат од она што го гледаат. Ако родителите покажат смиреност додека чекаат ред, во сообраќајот или додека се вчитува веб-страницата, детето постепено ќе го усвои тој став.
2. Воведете „време на чекање“
Постепено зголемувајте го времето помеѓу желбата на детето и нејзиното исполнување.
На пример, ако вашето дете побара закуска, кажете му: „Чекај пет минути, само да завршам нешто“. Така ќе научи дека не мора се да добие веднаш.
3. Играјте игри кои поттикнуваат трпение
Друштвените игри, сложувалките и секоја активност што бара чекање на ред му помагаат на детето да развие способност да ги контролира импулсите.
4. Вежбајте „одложена награда“
Познатиот експеримент со слатки (манчмелоу) покажа дека децата кои можат да чекаат подолг временски период пред да го изедат слаткото, постигнуваат поголем успех подоцна во животот. Обидете се со нешто слично дома – ветете му на вашето дете две чоколатца ако може да чека половина час наместо веднаш да изеде едно.
5. Ограничете ја вашата употреба на технологија
Брзината на Интернет и бескрајното лизгање на содржината ја намалуваат способноста на детето да се концентрира и трпеливо да чека. Воведете правило дека екраните се користат во одредени временски интервали и дека остатокот од денот вклучува активности кои бараат внимание и труд.
6. Помогнете му на вашето дете да ги препознае чувствата
Кога вашето дете ќе стане нетрпеливо, прашајте го како се чувствува и објаснете му дека е нормално понекогаш да сака нешто веднаш, но дека чекањето нè учи на самоконтрола.
Трпението е клучот за успехот. Трпението е моќ.
Тоа не е пасивно чекање, туку активно разбирање дека добрите работи доаѓаат кај оние кои се подготвени да чекаат.
Во време кога се може да се добие со еден клик, важно е детето да се научи дека вредните работи постепено се градат.
Трпението не е само чекање – тоа е вештина која гради карактер, носи успех и овозможува посреќен и поисполнет живот. Затоа што, на крајот – она што е навистина вредно вреди да се чека!