Менопаузата и срцевите проблеми

Една нова студија од Универзитетот Пен Стејт сугерира дека секојдневното пиење сок од цвекло може да ја подобри функцијата на крвните садови и да го намали ризикот од срцеви заболувања.

Ова рандомизирано, со плацебо контролирано клиничко испитување покажало дека сокот од цвекло, богат со нитрати, го подобрува протокот на крв низ крвните садови.

Наодите се објавени во Frontiers in Nutrition.

Сокот од цвекло може да помогне за здравјето на срцето

Истражувачите првично регрутирале 54 жени во постменопауза, но анализирале податоци од 24 жени (12 во рана постменопауза и 12 во доцна постменопауза).

Учесничките имале крвен притисок во мирување под 130/80 mmHg, БМИ помеѓу 18,5 и 35 kg/m², LDL холестерол под 160 mg/dL, хемоглобин A1C под 6% и нормален шеќер во крвта на гладно.

Сите биле непушачи и не земале кардиоваскуларни лекови или хормони.

Следејќи ги строгите диететски упатства, учесниците конзумирале две шишиња од 70 мл концентриран сок од цвекло на почетокот на студијата и едно шише дневно во текот на една недела.

Секое шише содржеше исто ниво на нитрати како три големи цвекла.

Подоцна, како плацебо им давале сок од цвекло без нитрати.

Користејќи доплер ултразвук, истражувачите го оцениле ефектот на сокот од цвекло врз протокот на крв во брахијалната артерија пред и по конзумирањето, споредувајќи го со плацебото.

Тие откриле дека дневниот сок од цвекло богат со нитрати го подобрува протокот на крв, но ефектот се намалува во рок од 24 часа од последното шише.

Ниту сокот богат со нитрати, ниту плацебото не го спречиле падот на протокот на крв по исхемиско-реперфузиска повреда.

Менопауза и проблеми со срцето

Д-р. Џејн Морган, кардиолог во Piedmont Healthcare Corporation, објаснила за Medical News Today дека намалениот естроген за време на менопаузата ги намалува неговите кардиопротективни ефекти, поради што се зголемуваат факторите на ризик од срцеви заболувања како што се покачен LDL холестерол, вкочанетост на крвните садови и висок крвен притисок.

Д-р. Џоселин M. Делгадо Спикуза од Универзитетот Пен Стејт забележала дека оваа група на фактори на ризик ги прави крвните садови ранливи на кардиоваскуларни болести по менопаузата.

Антиоксидантната и антиинфламаторната улога на естрогенот помага да се намали развојот на наслагите, а со тоа се намалува ризикот од срцев удар.

Дополнително, вазомоторните симптоми како топли бранови и намален сон сега се препознаваат како фактори на ризик за срцеви заболувања, особено меѓу жените со темна боја на кожата кои имаат потешки симптоми.

Нитрати и здравје на срцето

Делгадо Спикуза објаснува дека консумирањето нитрати од растенијата ја зголемува достапноста на азотен оксид во телото, кој ги шири крвните садови и го подобрува протокот на крв и доставувањето на кислород до органите.

По менопаузата, нитратите во исхраната можат да помогнат во одржување на здрава функција на крвните садови бидејќи нивото на естроген се намалува.

Таа нагласила дека се претпочитаат нитрати од растенијата наместо оние во преработките од месо.

Диететскиот нитрат од растително потекло останува ефикасен со континуирана употреба, за разлика од некои лекови за срце.

Најдобрите извори на нитрати вклучуваат лиснат зеленчук, билки и коренест зеленчук.

Потребни се дополнителни истражувања за да се утврди дали оваа храна може да ја подобри функцијата на крвните садови кај жените во постменопауза.

Д-р. Морган препорачала други намирници кои се здрави за срцето за жените во постменопауза, како што се сок од калинка, агруми, темно чоколадо, лиснат зеленчук, бобинки, маслиново масло, лук, риба и омега-3 масни киселини и зелен чај.

Овие намирници го поддржуваат кардиоваскуларното здравје преку различни механизми, како што се подобрување на протокот на крв, намалување на воспалението и подобрување на ендотелната функција.