Ова се најчестите причини за намален апетит кај децата: Во некои случаи, отсуството на желба за храна може да биде опасно

Губењето на апетитот кај децата може да ги загрижи повеќето родители, но оваа појава е доста честа кај децата на возраст од две до пет години. Меѓутоа, во некои случаи, губењето на апетитот може да биде причина за загриженост, известува Mom Junction. Ако вашето дете е често уморно и раздразливо, ова може да биде поврзано токму со недостатокот на апетит.

Бавен раст
Промената на растот кај децата може да доведе до намалување на апетитот, предупредуваат педијатрите. Во текот на првата година од животот, децата растат брзо, но подоцна овој раст се забавува. Во овој период, намалувањето на апетитот е сосема нормална и честа појава. Имено, според експертите, децата во втората година треба да се здебелат во просек по 2,3 килограми и да пораснат 12 сантиметри, за разлика од првата година од животот кога се очекуваат седум килограми и раст од 21 сантиметар.

Болест
Болеста може да предизвика значително губење на апетитот кај детето. Воспалено грло, стомачен вирус, дијареа, главоболка или температура се само некои од причините зошто детето може да јаде помалку од вообичаено.

Стресот
Стресот може значително да влијае на малите деца, а еден од главните симптоми на стресот е губењето на апетитот. За да се реши проблемот со намален апетит, неопходно е да се открие причината за стресот и да се ублажи. Некои од најчестите причини за стрес кај децата се смрт на член на семејството, раѓање на брат или сестра, смрт на домашно милениче, насилство или проблеми на училиште.

Депресија
Депресијата може да биде уште една причина за губење на апетитот кај детето. Повеќето родители ја мешаат депресијата со тага, но тагата и депресијата не се исти. Имено, чувството на тага со текот на времето исчезнува, додека депресијата е состојба која трае долго и треба да се лекува. Депресијата не само што го растажува детето, туку и го попречува неговиот секојдневен живот. Ако вашето дете покажува значителен недостаток на интерес за активностите во кои претходно уживало, има добри шанси да е депресивно, а промената во навиките за јадење може да бидат силен показател за депресија.

Анорексија нервоза
Понекогаш, сакајќи да ги копираат своите идоли или пријатели, децата развиваат психолошка аверзија кон храната и се обидуваат да останат без неа што е можно подолго. Дури и кога јадат, избираат храна со малку маснотии, а подоцна се чувствуваат виновни што ја јадат. Генетиката, хемиските нерамнотежи во мозокот и развојните проблеми исто така може да предизвикаат анорексија нервоза. Ако вашето дете избегнува храна или вежба повеќе отколку што треба и драстично слабее, можеби боледува од анорексија нервоза.

Одредени лекови
Ако вашето дете неодамна земало антибиотици, неговиот апетит може да се намали. Неколку други лекови исто така можат да влијаат на апетитот, а во случај да ги забележите овие несакани ефекти кај вашето дете, се препорачува веднаш да се јавите кај педијатарот.

Анемија
Анемија или недостаток на железо е уште една можна причина за намален апетит кај децата. Имено, анемичните деца често изгледаат уморно, летаргично и раздразливо. Доколку не се лекува навреме, анемијата може значително да го попречи развојот на детето, како и неговиот напредок во училиште.

Глисти
Глистите во цревата можат сериозно да го ослабат апетитот на детето. Имено, глистите влегуваат во дигестивниот систем и таму живеат како паразити, што доведува до цревни крварења, губење на апетит и дизентерија.

Запек
Неправилното функционирање на цревата кај детето, меѓу другото, може да доведе до запек, а соодветно на тоа, често доаѓа до губење на апетитот кај детето. Губењето на апетитот кај децата исто така може да доведе до запек. Најчестите знаци на запек се тешко празнење на цревата и тврда столица.