Историски гледано, постарите луѓе користеле интернет помалку од помладите, но со порастот на популарноста на паметните телефони, Интернетот станал попристапен за нив. Истражувањата покажаа дека тоа може да им помогне да го намалат ризикот од деменција.
Често слушаме за опасностите од премногу време на екранот, но новото истражување сугерира дека редовното сурфање на интернет може да го намали ризикот од деменција, пишува Daily Mail. Научниците од Универзитетот во Њујорк следеле 18.000 возрасни лица на возраст меѓу 50 и 65 години во текот на осум години. Ниту еден од учесниците немал деменција на почетокот на студијата, но до крајот таа била дијагностицирана кај 1.183 луѓе, или речиси пет проценти од учесниците.
Научниците ги прашувале на почетокот на студијата и на секои две години потоа дали редовно користат Интернет за да испраќаат е-пошта, да купуваат, да бараат или да резервираат одмор. Оние кои главно одговориле позитивно имале 50% помал ризик да бидат дијагностицирани со сите форми на деменција во споредба со оние кои обично велеле „не“ до крајот на студијата. Во групата која често користела Интернет, 224 од 10.333 учесници имале дијагноза на деменција, 1,5% од вкупниот број. Во втората група, односно групата која не користи редовно интернет, болеста ја развиле 959 од 7.821 учесник (10,45%).
Тие ги прилагодиле резултатите за други фактори на ризик, вклучувајќи образование, етничка група, пол, возраст и знаци на когнитивно опаѓање, но сепак откриле дека оние кои редовно користеле Интернет имале 50 отсто помал ризик од деменција. Авторите на истражувањето објаснуваат дека причината може да биде тоа што користењето на компјутер или мобилен телефон го стимулира мозокот и токму тоа го штити од пропаѓање.
Два часа користење интернет дневно е оптимално
Претходните истражувања, исто така, покажале дека користењето на интернет може да ја спречи деменцијата со тоа што ги охрабрува луѓето да научат нови вештини и го намалува чувството на осаменост. Во друг експеримент, истиот тим научници, исто така, открил дека два часа користење на Интернет дневно е оптимално за спречување на когнитивниот пад кај постарите лица.
Значи, потребно е да се ограничи времето поминато на Интернет бидејќи луѓето кои ретко или многу користеле Интернет имале многу поголем ризик од развој на деменција. Во овој дел од студијата, тие набљудувале група од 4.000 учесници, а резултатите покажале дека оние кои користеле Интернет до два часа дневно имале најмал ризик, додека оние кои биле на Интернет повеќе од осум часа имале повеќе од двојно поголем ризик. На другиот крај од спектарот, оние кои речиси и да не користеле интернет имале 67% поголем ризик од деменција.