Како да ја надминете тагата и да продолжите со животот откако ќе изгубите сакана личност

Ниту една тага не е иста и сите различно реагираме на смртта на саканите. Но, животот продолжува, а враќањето во секојдневниот колосек не е секогаш лесно. Справувањето со загубата на некој близок, член на семејството или пријател, може да биде еден од најтешките предизвици со кои се соочуваат многумина од нас. Кога ќе изгубиме брачен другар, брат или сестра или родител, нашата тага може да биде особено силна.

Повеќето зрели, возрасни луѓе, доживеале губење на некоја сакана личност. На некои им е потребно подолго време, а на некои пократко, некој страда тивко, а некој има потреба сите да знаат за неговата тага, некој бара заборав во работата, друг воопшто не може да работи. Како и во многу други аспекти, различни сме и во тагувањето
Загубата се сфаќа како природен дел од животот, но сепак можеме да бидеме обземени од шок и збунетост, што доведува до долги периоди на тага или депресија. Тагата обично се намалува во интензитет со текот на времето, но тагувањето е важен процес за надминување на овие чувства.

Ниту една тага не е иста…
Секој различно реагира на смртта на најблиските и користи лични механизми за да се справи со тагата. Истражувањата покажуваат дека повеќето луѓе можат сами да се опорават од загубата со текот на времето доколку имаат социјална поддршка и здрави навики. Можеби ќе бидат потребни месеци или години за да се помириме со загубата. Не постои „нормално“ време за некој да тагува. Не очекувајте ниту да поминете низ фазите на тагување, бидејќи истражувањата сугерираат дека повеќето луѓе не минуваат низ фази како прогресивни чекори.

Ако вашиот однос со починатиот бил тежок, ова исто така ќе додаде друга димензија на процесот на тагување. Можеби ќе ви треба дополнително време за размислување пред да можете да погледнете назад на врската и да се прилагодите на загубата.

Човечките суштества се природно отпорни, така што повеќето од нас можат да се справат со загуба и потоа да продолжат со својот живот. Сепак, некои луѓе може долго време да се борат со тагата и да се чувствуваат неспособни да ги извршуваат секојдневните активности. Луѓето на кои тагувањето им е особено тешко може да имаат корист од разговор со психолог.

Совети кои можат да го олеснат продолжувањето на животот
Тагувањето заради загубата на близок пријател или член на семејството бара време, но истражувањата ни кажуваат дека тоа исто така може да биде катализатор за обновено чувство на смисол што нуди цел и насока во животот.

На луѓето кои тагуваат може да им бидат корисни некои од следниве стратегии за да се помират со нивната загуба:

Разговарајте за смртта на некој близок со пријателите или колегите за полесно да разберете што се случило и да се сетите на вашиот пријател или член на семејството. Избегнувањето може да доведе до изолација и да го наруши процесот на заздравување.
Прифатете ги вашите чувства. Може да доживеете широк спектар на емоции, од тага, лутина или дури и исцрпеност. Сите овие чувства се нормални и важно е да препознаете кога се чувствувате така. Ако се чувствувате блокирани или обземени од овие емоции, може да биде корисно да разговарате со лиценциран психолог или друг професионалец за ментално здравје кој може да ви помогне да се справите со вашите чувства и да најдете начини да се вратите во колосек.
Грижете се за себе и вашето семејство. Здравата храна, вежбањето и доволното спиење можат да помогнат во вашето физичко и емоционално здравје. Процесот на тагување може да влијае на телото. Грижете се за здравјето на членовите на вашето семејство.
Помогнете им на другите да се справат со истата загуба. Поминувањето време со оние кои го сакале покојникот може да им помогне на сите и да ја олесни тагата. Без разлика дали станува збор за споделување приказни или слушање на омилената музика на вашата сакана личност, овие мали нешта можат да значат многу. Помагањето на другите исто така има дополнителна вредност затоа што и вие се чувствувате подобро.
Помнете ги и славете ги животите на вашите најблиски. Годишнините од смртта на некој близок може да бидат тежок период за пријателите и семејството, но може да биде и време на сеќавање, благодарност за времето што го поминавте со нив и почит.

Поддршката од најблиските е исклучително важна за оние кои страдаат од депресија
Топлите раце на најблиските ги бркаат сивите облаци на депресијата
Сведоци сме на лесно и непрецизно именување на нечија состојба на нерасположение со голем збор – депресија. Пред се, мораме да бидеме што е можно поточни и попрецизни…

Како може психологот да помогне?
Психолозите се обучени да им помогнат на луѓето подобро да се справат со стравот, вината или анксиозноста што може да биде поврзана со смртта на некој близок. Ако ви треба помош да се справите со тагата или да прифатите загуба, консултирајте се со психолог или друг лиценциран професионалец за ментално здравје.

Психолозите можат да им помогнат на луѓето да ја изградат својата отпорност и да развијат стратегии за справување со тагата. Притоа, тие користат различни третмани базирани на докази – најчесто психотерапија – за да им помогнат на луѓето да го подобрат својот живот. Затоа, не двоумете се да побарате стручна помош доколку сметате дека товарот ви е претежок. Не е лесно да се справите со тагата…