Штипската четворка си замина дома: Трите братчиња и нивната сестричка конечно во рацете на мама и тато
Во сигурните раце на мама и на тато, на 29 ноември замина нашата четворка – малата принцеза Леонтина и нејзините тројца браќа Михаил, Теодор и Ведран, информираа од Клиниката за гинекологија и акушерство – Скопје.
Нашите мали но големи борци родени во 31. гестациска недела си заминаа во добра состојба по 38 дена поминати на одделението за интензивна нега и терапија, информираат од Клиниката за гинекологија и акушерство-Скопје.
Михаил кој е роден со 1170 грама, дома си заминал со 1860 грама. Леонтина која е родена со 1100, ја испратиле со 1810 грама. Теодор е роден со 1200 грама, а дома си заминал со 1920 грама. Ведран кој е најголем и е роден со 1370 грама, го испратиле дома, во Штип, со 2000 грама.
Докторите и медицинските сестри и акушерки од Клиниката за гинекологија и акушерство на овие мали јунаци им посакуваат среќно детство исполнето со многу здравје, а на среќните родители Благица и Александар полна куќа детска смеа, многу радости и топлина во домот што ќе им ја донесат овие четири мали сонца.
Доктор Елена Ѓоргиевска Николовска, која „на свет“ ги донесе Михаил, Леонтина, Теодор и Ведран вели дека е прекрасно чувството сите четири бебиња заедно да се испратат дома и порача дека за сите кои беа дел од оваа среќна приказна, тоа било огромен предизвик.