Студијата анализирала повеќе од 87.000 пораѓања во вода во Англија и Велс помеѓу 2015 и 2022 година.
Истражувачите ги разгледале стапките на смртност на доенчињата, ефектите од породувањето врз мајката и бројот на новороденчиња на кои им биле потребни антибиотици или помош при дишењето во единицата за интензивна нега за новороденчиња, по раѓањето.
Според резултатите објавени во списанието за акушерство и гинекологија BJOG, се покажало дека ризиците не се поголеми кај пораѓањата во вода во споредба со раѓањата надвор од вода.
„Постојат извештаи дека бебињата може сериозно да се разболат, па дури и да умрат по породувањето во вода и дека мајките имаат поголема веројатност да претрпат посериозни повреди или голема загуба на крв. Откривме дека тоа не е точно“, рече Џулија Сандерс, професор по акушерство на Универзитетот во Кардиф.
Професорот Крис Гејл, неонатолог во фондацијата Челзи и Вестминстер NHS Foundation во Лондон, додава: „Многу педијатри и неонатолози се загрижени дека породувањето во вода може да носи дополнителни ризици за бебињата, но студијата откри убедливи докази дека за жените со некомплицирана бременост, тоа не е случај“.
Од 2003 година, раѓањето во вода се користи и во Хрватска. Првото било спроведено на Клиниката за гинекологија и акушерство на КБЦ Риека.
Според хрватското здружение за гинекологија и акушерство, породувањето во вода ја намалува болката, а со тоа и потребата за аналгезија.
Ја намалува зачестеноста на засеците во перинеумот поради релаксирачкиот ефект на топлата вода на мускулното дно на карлицата, ја зголемува можноста за промена на положбата при породување и го олеснува дишењето.
Сето ова заедно доведува до зголемување на задоволството на родилката.
„Тоа значи помал стрес за детето поради помалата промена на температурата при доаѓањето на свет бидејќи не доаѓа директно од плодовата вода во релативно студениот воздух“, велат тие.
За да може мајката да се породи во вода, треба да се исполнат неколку услови.
„Важно е да се работи за единечна терминска бременост, детето да е во правилна положба, текот на бременоста да е уреден и трудницата да е здрава.
Дополнително, тестовите за ХБВ, ХЦВ, ХИВ и кламидија кај бремената жена мора да бидат негативнаи.
Се препорачува преглед во 37-та недела од бременоста за да се утврди дали се исполнети критериумите за породување во вода и дополнително да се запознае трудницата со предностите и евентуалните причини поради кои породувањето не би можело да се заврши во вода“, заклучуваат од хрватското друштво за гинекологија и акушерство.