Социјалните мрежи се главна причина за депресија и анксиозност кај тинејџерите

Употребата на социјалните мрежи е главната причина за депресија, анксиозност и други проблеми кај тинејџерите во САД, предупреди шефот на американската служба за јавно здравје, доктор на медицински науки и вицеадмирал Вивек Мурти, долгогодишен заговорник на социјалното значење на менталното здравје, објави телевизијата NBC.

Неговото предупредување за социјалните мрежи доаѓа откако стапките на депресија, тага и безнадежност кај тинејџерите, особено кај девојчињата, се зголемија во изминатата деценија.

Шефот на американската служба за јавно здравје ги повикува технолошките компании и законодавците да преземат „итна акција“ за заштита на менталното здравје на децата и адолесцентите на социјалните мрежи.

Во извештајот објавен во вторникот, го насочува вниманието на растечката загриженост за последиците од користењето на социјалните мрежи врз менталното здравје на децата и адолесцентите. Мурти ги повикува креаторите на политиките и компаниите кои прават платформи за социјални медиуми да го споделат со родителите товарот за управување со тоа како децата и адолесцентите ги користат социјалните медиуми.

Мурти смета дека менталното здравје на младите е „клучно јавно здравствено прашање“ и ги повикува креаторите на политиките да помогнат да се обезбедат силни безбедносни стандарди за да се заштитат адолесцентите и тинејџерите од изложеност на штетни содржини и прекумерна употреба на социјалните медиуми.

Според извештајот на шефот на американската служба за јавно здравје, до 95 отсто од тинејџерите на возраст меѓу 13 и 17 години велат дека користат платформи за социјално вмрежување. Околу една третина велат дека „речиси постојано“ пребаруваат, објавуваат или на друг начин учествуваат на социјалните мрежи.

„Во овој момент, немаме доволно докази за да кажеме со сигурност дека социјалните мрежи се доволно безбедни за нашите деца“, вели Мурти во интервјуто, нагласувајќи дека „треба да преземеме акција сега за да се осигураме дека ги штитиме нашите деца. “

Неговиот извештај ги спојува истражувањата кои ја поврзуваат употребата на социјалните мрежи и лошото ментално здравје на адолесцентите, како што е студијата од 2019 година која покажа дека тинејџерите кои поминуваат повеќе од три часа дневно на социјалните мрежи „се соочуваат со двојно поголем ризик да имаат лошо ментално здравје, вклучувајќи симптоми на депресија и анксиозност“.

Осаменоста стана епидемија во САД, вели шефот на американската служба за јавно здравје, а минатата година, средношколците и средношколките се изјасниле во анкета дека поминуваат во просек по три часа и 30 минути дневно на платформите на социјалните мрежи.

Џим Стејер, основач на Common Sense Media, организација која се залага за закони и политики за да ги направат медиумите попријатни за децата, вели дека советот на Мурти е „апсолутно на место“ и „треба да биде повик до секој родител во оваа земја, до секој креатор на политиката, дека треба да ставиме фокус и да вложиме ресурси во тоа“, објави NBC.

Најпопуларните платформи за социјални медиуми меѓу американските тинејџери се TikTok, Snapchat и Instagram, според Истражувачкиот центар Пју.

„Депресијата меѓу тинејџерите почна да расте околу 2012 година, што се совпаѓа со популарноста на паметните телефони“, вели Жан Твенги, професор по психологија на Државниот универзитет во Сан Диего и автор на „Генерации: вистинските разлики помеѓу генерацијата Z, милениумците, генерацијата Икс, бумерите и молчеливите и што значат тие за иднината на Америка (Generations: The Real Differences between Gen Z, Millennials, Gen X, Boomers and Silents—and What They Mean for America’s Future).

Тоа беше време, вели Твенги, кога „лајковите“ на објавите станаа вообичаени, а алгоритмите почнаа да стануваат пософистицирани за да ги задржат луѓето подолго на социјалните мрежи. Ова очигледно не е случајност“.

Извештајот на шефот на американската служба за јавно здравје, исто така, ги обвинува социјалните мрежи за нарушувања во исхраната, телесна дисморфија и ниска самодоверба кај младите. Некои докази, исто така, укажуваат на можна врска помеѓу прекумерната употреба на социјални медиуми и нарушување на вниманието и хиперактивност (АДХД) кај тинејџерите.

Твенги вели, пишува NBC, дека социјалните мрежи можат да влијаат на менталното здравје на различни начини. И спиењето и социјалната интеракција лице в лице се добри за менталното здравје, рекла таа, но проблем е ако децата се онлајн кога треба да бидат во кревет или да поминуваат време со пријателите.

Таа истакнува дека чувството на изоставеност и споредување со другите исто така може да биде штетно.

„Дури и ако на интелектуално ниво знаете дека некој можеби направил 200 селфиња за да добие еден лајк, на емоционално ниво е различно, не е сосема „сварливо““, вели Твенги.

Извештајот на шефот на американската служба за јавно здравје ги наведува препораките и за технолошките компании и за законодавците.

„Креаторите на политиките треба да помогнат да се осигураме дека имаме силни безбедносни стандарди за да ги заштитиме нашите деца од изложување на штетна содржина, како и да ги заштитиме од прекумерна употреба на социјалните медиуми“, рече Марти, истакнувајќи дека тоа значи и спроведување на минимални старосни ограничувања.

На компаниите им се советува да создадат подобри алатки за заштита на тинејџерите и да ги намалат функциите што ги поттикнуваат децата да останат онлајн подолго.

Родителите сега се на првата линија во обидот да им помогнат на тинејџерите да се движат низ светот на интернетот, а шефот на американската служба за јавно здравје ги повика да создадат „зони без технологија“ дома и да разговараат со децата за тоа како се чувствуваат користејќи ги социјалните мрежи.

Стејер од „Common Sense Media“ вели дека „навистина не е фер товарот да се стави само на родителите. Зошто индустријата не се смета за одговорна за создавање платформи и создавање функции кои прават поголема зависнист?“ и посочи дека „треба да има голема национална дискусија за ова“.

Повеќето технолошки компании бараат нивните корисници да имаат најмалку 13 години. Но, речиси 40 отсто од децата на возраст меѓу 8 и 12 години користат социјални медиуми, според извештајот на шефот на американската служба за јавно здравје.

Мурти вели дека верува дека дури и 13 години се премногу млади за да бидат на социјалните мрежи, но дека нема доволно податоци за да се покаже која пониска возраст би била соодветна.

Твенги предлага минималната возраст да се постави на 16 години.

„Ајде да воведеме некои регулативи сега за да им помогнеме на децата кои сè уште не се на социјалните мрежи“, вели Твенги. „Можеби можеме да ја спасиме следната генерација“, заклучува NBC.

А новинската агенција АП го пренесува советот на шефот на американската служба за јавно здравје за младите, за родителите и за старателите кој вели дека „нашите деца и адолесценти го немаат луксузот да чекаат години додека не го дознаеме целосниот степен на влијанието на социјалните мрежи, нивното детство и развој се случуваат сега“.

Мурти ги советува младите да побараат помош од пријател или од доверлив возрасен ако сметаат дека социјалните мрежи негативно влијаат на нив или на некој што го познаваат и да ги читаат упатствата на Американската академија за педијатрија на социјалните мрежи.

За младите, Мурти препорачува да се постават граници: да се ограничи употребата на телефони, таблети и компјутери најмалку еден час пред спиење и во текот на ноќта за да се осигураат дека спијат доволно.

Тој, исто така, им кажува на младите да одвојат време за оброци и собири со пријателите без уреди за да помогнат во градењето социјални врски и навистина да разговараат лице в лице со другите.

„Поврзете се лично со луѓето и направете ги интеракциите без технологија ваш дневен приоритет“, истакна Мурти.

„Внимавајте што споделувате: Личните информации за вас имаат вредност. Бидете селективни за тоа што објавувате и споделувате на интернет и со кого го споделувате, бидејќи често е јавно и некој може да го задржи трајно. „Ако не сте сигурни дали треба да објавите нешто, обично е најдобро да не го правите тоа“, советува шефот на американската служба за јавно здравје.

Тој ги советува младите да не ги кријат вознемирувањето или злоупотребата, туку да допрат барем до една личност на која ѝ веруваат, како близок пријател, член на семејството, советник или учител, кој може да пружи помош и поддршка.

Тој, исто така, им препорачува на младите луѓе да одат на специјална веб-локација (stopbullying.gov) за да добијат совет како да пријават сајбер-малтретирање, кај кого да пријават вознемирување и злоупотреба на интернет и со кого да контактираат ако приватните фотографии се објавени и се споделуваат онлајн без дозвола и истите да бидат отстранети.

Шефот на американската служба за јавно здравје препорачува родителите и старателите да создадат „семеен медиумски план“ за користењето на социјалните мрежи. Тој план треба да се заснова на отворена семејна дискусија и да воспостави правила за користење на медиумите и да вклучува теми како што се колку време на екранот/онлајн, ограничувања на содржината и необјавување на лични информации.

Со „зони без технологија“ и ограничување на употребата на електроника на најмалку еден час пред спиење и во текот на ноќта, како и за време на оброците и состаноците, Мурти препорачува родителите и старателите да им помогнат на децата да развијат социјални вештини и да ги негуваат личните односи преку „офлајн врски“.

Шефот на американската служба за јавно здравје потсетува дека родителите можат да дадат добар пример за тоа како изгледа одговорното и здраво користење на социјалните медиуми со ограничување на нивната сопствена употреба, земајќи предвид кога и како родителите споделуваат информации или содржини за своето дете и дека со тоа позитивно се однесуваат на социјалните мрежи.

Тој ги советува родителите и старателите да им помагаат на децата со тоа што ќе ги учат за технологијата и за тоа како да бидат одговорни онлајн учесници соодветно на возраста.

„Разговарајте со децата за придобивките и ризиците од социјалните мрежи, како и за важноста од почитување на приватноста и заштита на личните информации на начин соодветен на возраста. „Разговарајте со децата за тоа со кого се поврзуваат, за поставките за приватност, онлајн искуствата и како го поминуваат времето таму“, препорача шефот на американската служба за јавно здравје.